Ҫӗнӗ Шупашкарта пурӑнакан 57 ҫулти хӗрарӑм ҫынна 105 хутран кая ҫӗҫӗпе чиксе пӗтернӗ, унсӑр пуҫне вӑл 20 хутран кая мар тапса-ҫапса пӗтернӗ.
Пӑтӑрмах хӗрарӑмӑн килӗнче кӑҫалхи нарӑс уйӑхӗн 2-мӗшӗнче пулса иртнӗ. Ӳсӗрскер пӗрле пурӑнакан 56 ҫулти арҫынпа тем пайлайман-ҫке — хирӗҫсе кайнӑ. Лешӗ унчченхи сурана пула хирӗҫ тӑрайман, хӑйне ниепле те хӳтӗленеймен.
Шар курнӑ арҫынна пульницӑна ӑсатнӑ-ха, анчах ӑна ҫӑлса хӑварма май килмен. Тепӗр кунне вӑл реанимацире вилсе кайнӑ.
Хӗрарӑм судпа унччен те темиҫе хутчен айӑпланнӑскер иккен. Ватлӑх ҫулӗсене вӑл кирпӗч шутласа ирттерӗ — тӗпчевӗҫсем пуҫиле ӗҫе суда ярса панӑ ӗнтӗ.
Улатӑр районӗнчи суд приставӗ суя дипломпа ҫӳренӗ. Вӑл ҫын Суд приставӗсен Улатӑр районӗнчи пайӗн пуҫлӑхӗнче ӗҫленӗ.
РФ Следстви комитечӗн Чӑваш Енри управленийӗнче пӗлтернӗ тӑрӑх, 2004-2006 ҫулсенче ҫав ҫын (вӑл ун чухне пристав-исполнитель пулса тӑрӑшнӑ) Мускаври потребитель кооперацийӗн университетӗнче пӗлӳ илни ҫинчен диплом туяннӑ.
Асӑннӑ документ арҫынна кайран ҫул уҫса пынӑ. Дипломлӑ этем пысӑкран пысӑкрах ӗҫ вырӑнӗсем йышӑннӑ. Суя диплом алӑра пулнӑран «Юриспруденци» специальноҫа та кӗске вӑхӑтра алла илнӗ.
Пурӑнсан-пурӑнсан ултав ҫиеле тухнӑ. Суд приставӗсен пайне ертсе пынӑ арҫын тӗлӗшпе пуҫиле ӗҫ пуҫарнӑ, ӗҫе суда ярса панӑ.
Сӗнтӗрвӑрри хулинче ҫамрӑк хӗрарӑм путвала кӗрсе ӳкнӗ.
27 ҫулти хӗрарӑм хулари Лазо урамӗнчи ҫуртсенчен пӗри ҫумӗпе утса иртнӗ. Ҫавӑн чухне вӑл унти путвала персе аннӑ.
Пӑтӑрмах кӑҫалхи ака уйӑхӗн 30-мӗшӗнче ҫурҫӗр тӗлӗнче пулнӑ. Шар курнӑ хӗрарӑм шӑм-шакне, алли-уррине ыраттарнӑ тата суранлатнӑ.
Асӑннӑ ҫурта тытса тӑракан управляющи компани шӑтӑка хупланӑ е путвала кӗмелли алӑк патӗнчи территорие карта тытса ҫавӑрнӑ пулсан пӑтӑрмах пулмастчӗ тесе пӗтӗмлетнӗ специалистсем.
Управляющи компани тӗлӗшпе пуҫиле ӗҫ пуҫарнӑ.
Ҫӗнӗ Шупашкарта ҫамрӑк арҫынна 6 ҫулти хӗрача ҫумне ҫулӑхнӑ тесе тытса чарнӑ. Ун тӗлӗшпе пуҫиле ӗҫ пуҫарнӑ. Тӗпчевҫӗсем ҫав этем ытти чух та ҫавӑн пек хӑтланса ҫӳремен-ши тесе шанмаҫҫӗ. Арҫын усал ӗҫ тунӑран шар курнисене пӗлтерме ыйтаҫҫӗ.
РФ Следстви комитечӗн Чӑваш Енри управленийӗнче пӗлтернӗ тӑрӑх, утӑ уйӑхӗн 31-мӗшӗнче Ҫӗнӗ Шупашкарта 6 ҫулти хӗрача хӑйӗн килӗнчен инҫе мар скверта выляса ҫӳренӗ. Ҫавӑн чухне ӑна ют арҫын тӗмсем хушшине астарса чӗннӗ. Унта вӑл ача ҫумне ҫулӑхнӑ.
РФ Следстви комитечӗн Чӑваш Енри управленийӗн пуҫлӑхӗ Александр Полтинин Ҫӗнӗ Шупашкарта ҫынсене хӑйсен ыйтӑвӗсемпе йышӑннӑ. Ҫавӑн чухне ун патне 4 ҫын пынӑ. Вӗсенчен пӗри ӑнлантарса панӑ тӑрӑх, унӑн мӑнукӗ, 1977 ҫулта ҫуралнӑскер, кӑҫалхи ҫӗртме уйӑхӗнче хӑйӗн ҫине алӑ хунӑ. Ҫавӑншӑн хӗрарӑм хӑйсен ҫемйине лӑпкӑ пурӑнма ирӗк паман пӗр этем айӑплӑ тесе шухӑшлать. Вӑл вӗсене кӑмӑл-сипет тата психологи тӗшӗнчен пусмӑрласа тӑрать имӗш. Вӑйпитти хӗрарӑм шӑпах ҫавна чӑтайман-мӗн.
Александр Полтинин ҫынна хӑйӗн ҫине алӑ хурасси патне илсе ҫитернӗшӗн хӑйӗн ӗҫченӗсене вӑрах тӑхтамасӑр пуҫиле ӗҫ пуҫарма хушнӑ. Пуҫиле ӗҫе епле тӗпченине вӑл хӑй тӗрӗслесе тӑрӗ.
Канаш районӗнче пурӑнакан 32 ҫулти арҫын чарӑнура тӑракан хӗрарӑма вӗлерессипе хӑратса пусмӑрланӑ. Пӑтӑрмах кӑҫалхи ака уйӑхӗн 30-мӗшӗнче каҫхине пулса иртнӗ.
Арҫын «Ҫӗрпӳ — Вӑрмар енне пӑрӑнакан ҫул» чарӑнура тӑнӑ. Унта вӑл 33 ҫулти унччен палламан хӗрарӑм ҫумне ҫулӑхнӑ. Ӑна вӑрман посадкине вӑйпа илсе кӗрсе кайнӑ, вӗлерессипе хӑратса пусмӑрланӑ.
Халӗ суд ҫав этеме 4 ҫул та 3 уйӑхлӑха пӗтӗмӗшле режимлӑ колоние ӑсатма йышӑннӑ.
2020 ҫулхи авӑн уйӑхӗн 4-мӗшӗнче Канашри 48 ҫулти арҫын икӗ ҫамрӑка хӑйӗн хваттерне тара панӑ. Тепӗр кунхине ирхи 1 сехет тӗлӗнче ун патне кӳршисем шӑнкӑравланӑ, хваттерте питӗ шавлаҫҫӗ тесе евитленӗ. Хваттер хуҫи ҫамрӑксем патне шӑнкӑравланӑ, анчах лешсем телефона тытман. Ҫавӑн хыҫҫӑн арҫын хӑйӗн арӑмӗпе ҫав хваттере ҫул тытнӑ. Каччӑсемпе хваттер хуҫи хирӗҫсе кайнӑ. Ӳсӗр ҫамрӑк 48 ҫулти арҫынпа ҫапӑҫма пуҫланӑ. Ӑна вӑл 4 хутран кая мар чышкӑпа ҫапнӑ, 1 хутчен кӗленчепе пуҫӗнчен кӗрӗслетнӗ.
Кил хуҫи пуҫтахран тарса балкон ҫине тухнӑ. Унта каччӑ арҫынна уҫӑ чӳречерен тӗксе янӑ. Лешӗ ӳкес мар тесе балкон чӳречин раминчен ярса илнӗ. Анчах каччӑ ӑна аллинчен кӗленчепе ҫапма тытӑннӑ.
Арҫын виҫҫӗмӗш хутран персе аннӑ, анчах ӑна вӑхӑтра пулӑшнине кура вӑл чӗрӗ юлнӑ.
Йӗпреҫ районӗнчи 19 ҫулти каччӑ тӗлӗшпе ҫынна вӗлерме тӑнӑ тесе пуҫарнӑ пуҫиле ӗҫе халӗ суда ярса панӑ.
Шупашкарти ҫамрӑк лавккари телефона укҫа тӳлемесӗр йӑтса тухса кайнӑ. Халӗ каччӑ тӗлӗшпе пуҫиле ӗҫ пуҫарнӑ.
Каччӑ 90 пине яхӑн тенкӗ тӑракан телефона интернет урлӑ саккас парса туянма шухӑш тытнӑ. Хаклӑ гаджет интернет-лавккан тавар паракан пунктне ҫитнӗ. Йӗрке тӑрӑх, ҫын малтан тавар илет, унтан уншӑн укҫа тӳлет. Каччӑ суту-илӳ йӗркин пӗр пайне пӑхӑннӑ, анчах иккӗмӗшне — ҫук. Вӑл телефоншӑн укҫа тӳлемен — тавара илсе тухса кайнӑ.
Телефон ҫухалнӑ тесе йӗрке хуралҫисене пӗлтернӗ хыҫҫӑн пакунлисем каччӑна шырама тытӑннӑ, ӑна тупса палӑртнӑ хыҫҫӑн ун тӗлӗшпе пуҫиле ӗҫ пуҫарнӑ.
Етӗрне хулинчи общежитире пӗр арҫын хӑйӗн икӗ пӗлӗшне тискеррӗн вӗлернӗ.
2021 ҫулхи ҫурла уйӑхӗн 5-мӗшӗнче ҫав арҫын хӑйӗн кӳрши патӗнче эрех ӗҫсе ларнӑ. Ушкӑнра пӳлӗм хуҫипе пӗрлех тепӗр ҫын та пулнӑ. Сӑра сакки сарлака — ӗҫсен-ӗҫсен виҫӗ пӗлӗш хирӗҫсе кайнӑ. Вӗсенчен пӗри иккӗшне вӗлерме шухӑш тытнӑ.
Кӳршӗ арҫынни юнашар пӳлӗмре пурӑнакана чышкӑпа тата йывӑҫ пуканпа хӗнеме тапранса кайнӑ. Пурӗ 61 хутран кая мар ҫапнӑ. Унтан ҫӗҫӗ ярса илсе унпа 35 хутран кая мар чикнӗ. Тепӗр арҫынна та вӑл хӗнесе пӗтернӗ. Ӑна 8 хутран кая мар ҫӗҫӗпе чикнӗ. Усал арҫын ун хыҫҫӑн кил хуҫин пуҫне тата сылтӑм аллине чӗртсе янӑ.
Преступление пытарас тесе хайхи этем пӳлӗме чӗртсе янӑ, хӑй вара унти телевизора йӑтса тухса кайнӑ.
Халӗ ҫав арҫынна суд 20 ҫуллӑха ҫирӗп режимлӑ колоние ӑсатма йышӑннӑ. Тӗрмерен тухсан та унӑн тӗнче тӑрӑх тата тепӗр ҫулталӑк хушши ирӗклӗ ҫӳреме май килмӗ.
Ҫӗрпӳ хулинче тиев турттармалли «Валдай» автомобиле чӗртсе янӑ. Вырӑнти пасар территорийӗнче ларакан машина ҫуннине ҫӗртме уйӑхӗн 30-мӗшӗнче 3 сехет те 40 минутра таксист асӑрханӑ. Ҫавӑн пирки вӑл йӗрке хуралҫисене пӗлтернӗ. Вут-ҫулӑма пушарпӑ кӗрешекенсем сӳнтернӗ.
Йӗрке хуралҫисем ҫав каҫ урамра ҫамрӑксен ушкӑнне асӑрханӑ. Вӗсене полицейскисем ШӖМӗн вырӑнти пайне лартса кайнӑ. Машинӑна шӑпах ҫав виҫӗ ҫамрӑк чӗртсе яни ҫиеле тухнӑ. Малтан бензин сапнӑ, унтан чӗртсе янӑ. Усал шухӑш тытнӑскерсем ҫипуҫа ылмаштарса тӑхӑннӑ.
Каччӑсем тӗлӗшпе пуҫиле ӗҫ пуҫарнӑ. Малтанласа палӑртнӑ тӑрӑх, ҫамрӑксенчен пӗри автомобиль хуҫине кӳреннӗ, ҫавӑнпа тавӑрас тенӗ.
+13.3 °C